Zec 10 | NdeIBE | STEP | Celani kuJehova izulu ngesikhathi sentwasahlobo; nguye uJehova owenza amayezi aleziphepho. Unika imikhizo yezulu ebantwini, lezihlahla zeganga ebantwini bonke.

Zechariah 10

UJehova Uzamnakekela UJuda

1 Celani kuJehova izulu ngesikhathi sentwasahlobo; nguye uJehova owenza amayezi aleziphepho. Unika imikhizo yezulu ebantwini, lezihlahla zeganga ebantwini bonke.

2 Izithombe zikhuluma inkohliso, izangoma zibona imibono yamanga; zikhuluma amaphupho amanga; ziphe induduzo engesulutho. Kungakho abantu bephumputheka njengezimvu bahlupheke ngoba bengelamelusi.

3 “Ulaka lwami luyavutha kubelusi, njalo ngizabajezisa abaholi; ngoba uJehova uSomandla uzawunakekela umhlambi wezimvu zakhe, indlu kaJuda, abenze babe njengebhiza elilesithunzi empini.

4 Ilitshe lengosi lizavela kuJuda, kuye kuzavela isikhonkwane sethente, kuye kuzavela idandili lokulwa impi, kuye kuzavela bonke ababusi.

5 Ndawonye bazakuba njengabantu abalamandla benyathela udaka emigwaqweni yempi. Kuthi-ke njengoba uJehova ephakathi kwabo, bazakulwa babanqobe abagadi bamabhiza.

6 “Ngizayiqinisa indlu kaJuda, ngisindise indlu kaJosefa. Ngizababuyisa ngokuba ngilesihawu kubo. Bazakuba sengathi kangizange ngibakhalale, ngokuba nginguJehova uNkulunkulu wabo njalo ngizabaphendula.

7 Abako-Efrayimi bazakuba njengeziqhwaga, lezinhliziyo zabo zizajabula kungathi banathe iwayini. Abantwababo bazakubona lokho bathokoze; izinhliziyo zabo zizathokoza kuJehova.

8 Ngizabamema ngibabuthe ndawonye. Ngempela ngizabahlenga; bazakuba banengi njengakuqala.

9 Lanxa ngibahlakazile phakathi kwezizwe, kodwa bazangikhumbula khonale emazweni akude. Bona kanye labantwababo bazaphila, njalo bazabuya.

10 Ngizababuyisa basuke eGibhithe ngibaqoqe e-Asiriya. Ngizabaletha eGileyadi leLebhanoni, kuze kungasabi lendawo ebaneleyo.

11 Bazadabula phakathi kolwandle lokuhlupheka; ulwandle oluphuphumayo luzadediswa lezinziki zonke zeNayili zizakoma qha. Ukuzikhukhumeza kwe-Asiriya kuzadinsilelwa phansi lentonga yobukhosi yaseGibhithe izaphela.

12 Ngizabaqinisa kuJehova, bona bazahamba ngebizo lakhe,” kutsho uJehova.